कुलवृत्तांत फाइल्स

कुलवृत्तान्तामधून माहिती शोधण्याची पद्धत

नमस्कार, शांडिल्य जोशी (चित्पावन) प्रतिष्ठानच्या कुलवृत्तान्त समितीने (१९७२) आणि पहिल्या विश्वस्त मंडळाने (१९८२) १५०० पानी कुलवृत्तान्त प्रकाशित केला. त्यानंतर २०२० पर्यंत महाराष्ट्रभर ३९ वार्षिक संमेलने साजरी करण्यात आली, हे आपणास विदित आहेच.

करोनानंतर २०२५ मध्ये सर्व उपक्रम पुन्हा सुरू करताना प्रथम मेळावा (जुलै २०२५) आणि ४० वे भव्य संमेलन (जानेवारी २०२६) साजरे करण्यात आले. त्याचबरोबर प्रतिष्ठानची वेबसाईट अद्ययावत करून ऑगस्ट २०२६ मध्ये कुलवृत्तान्त (१९८२) PDF स्वरूपात सर्वांसाठी उपलब्ध केला आहे.

यामुळे आता १९८२ नंतरच्या दोन पिढ्यांची माहिती कुलबंधूंकडून मिळवून डिजिटल स्वरूपात एकत्रित करण्याचा उपक्रम हाती घेत आहोत. आपल्या घराण्याची किंवा कोकणातील मूळ गावाची, तसेच वडील, चुलते आणि आजोबा यांची माहिती कुलवृत्तान्तामध्ये कुठे आहे हे जाणून घेण्यासाठी खाली सोदाहरण माहिती दिली आहे.

1. फक्त घराणे अथवा कोकणातील मूळ गाव माहीत असल्यास: कुलवृत्तान्ताच्या सुरुवातीची “अनुक्रमणिका” पाहावी. त्यामध्ये एकूण ८७ घराण्यांची नावे असून, प्रत्येक घराण्याची माहिती कोणत्या पानावर आहे हे कळेल.
2. घराण्याची माहिती माहीत नसल्यास: वडील, आजोबा, काका किंवा चुलते यांची पूर्ण नावे माहीत असल्यास, शेवटी असलेल्या १५० पानी व्यक्तिनामसूचीमधून त्यांची नावे कोणत्या पानावर आहेत याची माहिती आणि घराण्याचे नाव निश्चित मिळवता येईल.
3. वंशवृक्ष आणि माहिती: अशा प्रकारे मिळवलेल्या माहितीमध्ये एका पानावर वंशवृक्ष (Family Tree) मिळेल, ज्यामध्ये आठव्या/नवव्या पिढीची नावे असतील. दुसऱ्या पानावर त्यांची थोडक्यात माहिती मिळेल. या दोन महत्त्वाच्या पानांच्या स्कॅन कॉपी प्रतिष्ठानला WhatsApp किंवा ई-मेलद्वारे पाठवून द्याव्यात.
4. उदाहरण:
   माझे नाव: विलास बळवंत जोशी
   घराणे: फडणीस व सुभेदार
   मूळ गाव: वरवडे
   
   आता कुलवृत्तान्तामध्ये अनुक्रमणिकेतील क्रमांक ५२ वर या घराण्याचे नाव आहे. आमचा वंशवृक्ष पान क्रमांक ७४८ वर आणि वंशाची माहिती पान क्रमांक ७५१ वर आहे, हे कळते. आपणास माहीत असलेल्या काका, चुलते इत्यादींची नावे व त्यांची माहिती पाहून खात्री करावी.