आपल्याबद्दल

महर्षी शांडिल्य प्रतिष्ठानची स्थापना जरी १६ सप्टेंबर १९८३ रोजी झाली असली तरी त्याचा उगम त्यापूर्वी १० वर्षे कार्यरत असलेल्या 'चित्तपावन शांडिल्य गोत्री जोशी कुलवृत्तांत समिती' यामध्ये आहे. श्री. परशुराम कमलाकर जोशी (सांप्रत वय ९७ वर्षे) यांचा बालपणापासून ध्यास होता की अशा प्रकारचा कुलवृत्तांत असायला पाहिजे.

विविध ठिकाणाहून वंशावळी आणि कुटुंबाची माहिती जशी जमा होऊ लागली तसे त्याचे संकलन करण्याचे अत्यंत बिकट काम श्री. रा. द. जोशी आणि श्री. दि. बा. मोकाशी यांनी केले. सारे हस्तलिखित संकलन झाल्यावर संपादकीय संस्करण दि. बा. यांनी केले. परंतु लेखन अपूर्ण स्थितीत असतानाच त्यांचे दुःखद निधन झाले. पुढे ती प्रस्तावना न. म. जोशी यांनी लिहिली.

अखेर ९ वर्षांचे अथक परिश्रमानंतर १५०० पानांचा महाकाय कुलवृत्तांत छापून तयार झाला. त्याचा प्रकाशन समारंभ मोठ्या थाटात २८ मार्च १९८२ रोजी पुण्यात ब्राह्मण मंगल कार्यालयात प्रसिद्ध पत्रकार, संगीत नाटककार पं. विद्याधर गोखले यांच्या शुभहस्ते साजरा झाला.

कुलवृत्तांत प्रकाशनानंतर समितीकडे रू. ४०,०००/- शिल्लक होते. आता ही समिती विसर्जित करून "महर्षी शांडिल्य प्रतिष्ठान, पुणे" अशी न्यासाची (Trust) स्थापना करण्याचा निर्णय घेऊन १६ सप्टेंबर १९८३ रोजी ई-८६५ (पुणे) या क्रमांकाने धर्मादाय आयुक्त (पुणे) यांच्याकडे नोंदणी करण्यात आली.

प्रतिष्ठानचे पहिले अध्यक्ष — श्री. आबासाहेब जोशी, उपाध्यक्ष — श्री. गो. के. मनोळीकर, कार्यवाह — श्री. प. क. जोशी, आणि विश्वस्त म्हणून श्री. मनोहर यशवंत उर्फ बापूसाहेब जोशी आणि श्री. न. म. जोशी ह्यांची नेमणूक झाली.

प्रतिष्ठान दरवर्षी विद्यार्थ्यांना शैक्षणिक अर्थसहाय्य, गरजू व्यक्तींना वैद्यकीय अर्थसहाय्य करत आहे. याव्यतिरिक्त भूकंप, पूर, दुष्काळ अशा नैसर्गिक आपत्तीच्या वेळी सामाजिक जबाबदारी पोटी पंतप्रधान/मुख्यमंत्री सहाय्यता निधीस देणगी देते.

गेल्या ४३ वर्षांत कोरोना साथीचा काळ वगळता प्रतिष्ठानने कार्यकर्त्यांच्या भरवशावरच ४० कुलसंमेलने अव्याहतपणे भरवली आहेत. त्यातील २१ पुण्यात तर १९ पुण्याबाहेर नागपूर, बडोदा, चिपळूण, रत्नागिरी, कोळथरे अशा ठिकाणी उत्तमरित्या भरवली गेली. आता प्रगत तंत्रज्ञानामुळे नानाविध संपर्कसाधने उपलब्ध आहेत. त्याचा वापर करून कुलवृत्तांत अद्ययावत करण्याचा विचार आहे. ज्यांना जसं शक्य आहे त्यांनी तसे या कामाकरता योगदान द्यावे असे प्रतिष्ठानचे आवाहन आहे.